日漸長大的證據

一）動機

Mango B 是個守規的學生，亦願意負起當學生的責任。據她憶述，在課堂裡，她是個積極參與學習的學生，例如：她會舉手回答老師的問題，亦會努力完成課堂的任務。

有一天，她的中文老師因病請假，課堂便改由替代老師接管，老師以社際比賽方式，鼓勵學生多舉手答問題，愈答得多，該社就愈多得分，最高得分的社勝出。

Mango Ma：咁邊個house贏呀？

Mango B：我個house同埋xxx

Mango Ma：嘩，犀利喎，恭喜你呀！你有無份幫手攞分架？

Mango B：梗係有啦！不過都唔知點解老師要咁囉

Mango Ma：咁老師想鼓勵多d同學舉手答問題呀嘛，咁係咪真係多咗d平日唔答問題既人都舉手呀？

Mango B：係呀，xx同埋xxx平時都唔舉手，今日都有舉

Mango Ma：咁咪係囉，老師就係想咁

Mango B：😅唔係呀嘛，答問題係令自己學多d野，唔係為咗計分囉，有無計分都應該舉手答架

Mango Ma：係，你又講得啱既，不過未必個個小朋友都識咁諗，所以老師都想鼓勵下佢地囉

二）尷尬

由於之前的普通話補習老師離港工作，Mango Ma 為 Mango B 找來另一位老師與她在家學習普通話會話。

Mango Ma：xx老師教咗你幾堂啦喎，你覺得學成點呀？

Mango B：ok呀

Mango Ma：點ok呀？講多d黎聽下

Mango B：都好似平時咁囉，佢d音準d，同埋佢會講多d野比我聽

Mango Ma：咁好似都幾好呀！咁有無野唔好呀？

Mango B：你唔好講比佢聽喎！佢上堂會釣魚架

Mango Ma：下！釣魚？點釣呀？成日都釣架？

Mango B：試過幾次啦，佢同我一齊讀書，讀讀下就無咗聲，我就見到佢釣魚啦

Mango Ma：咁你點呀？

Mango B：我好驚呀，又唔敢叫佢，又唔知點好

Mango Ma：係啦，咁咪好怪囉，佢會唔會自己起番身架？

Mango B：通常我會呢，讀到一個字就停喺度，扮唔識，我一停，佢就會醒架啦，咁佢就教番我囉，但其實嗰個字我唔係唔識讀架

Mango Ma：😅你識咁樣做你好叻喎，你又唔想令老師尷尬，又可以叫到佢起身

Mango B：咁我唔敢叫佢呀嘛

Mango Ma：係呀我知呀，你好叻呀，不過如果佢成日都係咁，你都要話比媽咪知架

三）澄清

Mango B 每星期有兩節芭蕾舞課，以滿全跳舞學校的課節要求。兒時 Mango B 十分喜歡跳芭蕾舞，她並不在意表演，反而是喜歡舞蹈的優雅。轉眼間，她已經學了四年。唯近日送她去上課時，她總是帶點不情願。

Mango Ma：媽咪留意到你呢排成日去上ballet都有d扭計喎，係咪唔想學啦？

Mango B：唔係呀

Mango Ma：呢d係興趣班嘛，無興趣係可以唔學架喎，唔一定要學架，你唔鍾意要話比媽咪聽，知唔知呀？

Mango B：我唔係唔鍾意學 ballet，係唔鍾意而家教 ballet 既老師

Mango Ma：😅噢，原來係咁，咁我都鍾意以前Ms Fok教多d呀，希望你升咗班之前有個更加夾到既老師啦！

四）承擔

每天晚飯時，Mango B 都會將全日的學校生活與 Mango Ba & Ma 分享

Mango B：今日grammar係分組呀

Mango Ma：係呀，咁今日分組做d咩呀？

Mango B：每組有一張紙，要搵番d connectives出黎呀，然後就...（下刪十數句）

Mango Ma：咁應該難唔到你呀？

Mango B：係呀，不過個個都走哂呢

Mango Ma：下，走去邊呀？

Mango B：阿A就話要去廁所，阿B就話要去locker攞件褸，阿C就要去nurse嗰度，得番我一個喺枱度

Mango Ma：😅下，咁你咪好慘囉，一個人做四個人既野

Mango B：咁阿B都好快啫，佢去攞一攞野就番黎，我同阿B咪做住先，留番少少比佢地兩個做

Mango Ma：你好乖女呀，好盡責，有時一組人就係會有呢d問題，你唔駛勞氣架，盡量做就得架啦，媽咪支持你

五）獨立

不知從何時開始，Mango Ma 每晚都會送 Mango B 上床睡覺，我會為她講故事，還會一起祈禱。這個習慣建立至今，除了少數 Mango Ma 外出的日子外，從不打破，每當 Mango Ma 未能完成責任，都要受到 Mango B 嚴苛地問責，又或是為 Mango B 帶不來不成比例的傷感。 

有一天，Mango Ma 在Mango B 進睡時間前幾分鐘感到肚痛，Mango Ma 只好趕急地上廁所。

Mango Ma：媽咪好急呀，要去廁所呀

Mango B：你去poo poo呀？

Mango Ma：係呀

Mango B：你去啦

Mango Ma：我叫爸爸同你去瞓覺啦

Mango B：唔駛啦，你去啦

Mango Ma：咁我叫姐姐陪你去啦

Mango B：唔駛啦，你去啦

Mango Ma：咁你自己呀？

Mango B：係呀

Mango Ma：咁叻女呀，好啦，我去啦咁，去完出黎裝下你瞓咗未啦

Mango B：唔

當 Mango Ma 完成大事後，便趕緊到房間找 Mango B，只見她已經在黑暗的房間中安躺著，準備睡覺。Mango Ma 掃掃她的額角，跟她說聲 goodnight，便離開她的房間了。

六）幻象

Mango B：媽咪，我琴晚發夢呀

Mango Ma：係呀，發咩夢呀？

Mango B：我喺學校玩，玩玩下，就行到去廁所，跟住我就除褲想wee wee

Mango Ma：噢，咁跟住呢？

Mango B：我知道呢個廁所唔係真既，咁我就擘大眼，跟住我覺得好急，咁我就去咗廁所wee wee啦

Mango Ma：你好叻喎，知道個夢入面個廁所唔係真既，我都成日發呢d夢架，咁你點知唔係真架

Mango B：因為我痾咗一滴😅

七）變幻無常

Mango Ma：嘩，今日我食lunch時不知幾肚餓

Mango B：我都係喎

Mango Ma：爸爸都係咁話喎，可能因為琴晚早食飯啦

Mango Ba：係啦，都幾好呀

Mango Ma：我都覺得好呀，又無咁迫人，又多d時間消化，唔駛食咁飽去瞓

Mango Ba：咁以後都咁啦

Mango B：咁又唔駛以後

Mango Ba & Ma：🤣🤣

Mango B：things will always change