學習態度

正所謂「三歲定八十」，Mango Ma 發現 Mango B 三歲時的脾性愈來愈明顯，有見這句諺語這麼有參考價值，Mango Ma 決定要勾劃出現時觀察到 Mango B 在學習方面的脾性，看看若干年後她是否仍舊是這樣子，還是脫胎換骨，有另一類的表現。

整體來說，Mango B 都算是一個勤奮努力的學生，她會盡力完成老師的要求，她亦願意在課堂中積極參與，舉手答問題。她的字寫得清晰、整齊，字體端正，功課亦見條理，自理方面亦大抵可以自行處理。她的記憶力不錯，特別是事件性的記性尤其出色。她是個好勝的孩子，想贏、想做得好、喜歡受讚賞，希望自己能夠成功。總的來說，她算是一個好學生。

話雖如此，她暗地裡是個有惰性的人，她喜歡休息、休閒、玩樂遠多於學習，小時候甚至會查明工作是否「一定」要做，然後才「死死氣」去完成，十分計較。對於過錯，她十分在意，並不輕易放過自己，會鬧自己衰、曳，尚未參透「失敗乃成功之母」的道理。

另外，在日常生活的小節中，Mango B 的學習態度亦呈現得淋漓盡致。

一氣呵成 Work Hard, Play Hard

現時，學校安排 early childhood 的學生每天只有三份二時間以 online learning 模式學習，另外三份一時間為 offline learning，Prep Year 那年，offline learning 總是玩玩網上學習遊戲、看看書，甚至是 free play 時間，唯 Year 1 開始，Mango B 的 offline 時段會有學習任務需要完成，例如：寫字、做句、計算、繪畫、錄影等，自此，Mango B 的 offline 時段十分忙碌，事實上，她實在是「由朝做到晚」。

星期六、日相對輕鬆得多，Mango B 可以任意決定起床時間，整天就只有 45 分鐘的芭蕾舞課，其餘時間全都是自由時間，亦會帶她外出遊玩。有一次，Mango family 上午外出遊玩，午飯後需回家準備舞衣，然後到跳舞學校芭蕾舞課。路上，Mango Ma & B 閒談著：

Mango B: 媽咪，我唔想 ballet 呀！

Mango Ma: 點解呀？你一向都好鍾意架！

Mango B: 我唔鍾意咁樣中間要去學野

Mango Ma: 啊，你鍾意玩全日，唔駛中途斷開

Mango B: 係呀，我鍾意一日全日都玩，另一日全日都做野

Mango Ma: 咁全日都玩我就梗係明啦，但係全日都做野咪好辛苦囉

Mango B: 唔會呀，咁樣仲辛苦呀

Mango Ma: 唔係玩一陣，又做一陣，咁樣間住間住好Ｄ咩？

Mango B: 唔係

Mango Ma: 好啦，咁我下次知道啦，我幫你安排Ｄ活動集中埋喺同一日度啦

Mango B: 好！

Mango Ma: 多謝你話比媽咪聽，等媽咪知道你既心意

先苦後甜

Mango B: 好攰呀！

Mango Ma: 咁你休息吓啦！

Mango B: 唔好呀，我想做哂先呀！

Mango Ma: 唔好咁啦，做咩要咁樣迫自己？

Mango B: 我唔想呀，我想做哂佢先

Mango Ma: 你呢個傻妹，唔駛咁既，比自己休息一陣，等自己無咁攰，Ｄ字都寫得靚Ｄ，個腦諗野都快Ｄ，唔駛咁樣迫死自己既，我知你好盡責，但係都要比自己有適量既休息架嘛

Mango B（忽然想通了）: 係呀，要 Balance 呀嘛！

Mango Ma: 係啦，好似你個 Badge 咁，休息下先再做啦！

然後，Mango B 就會像一條懶蛇一樣撻在沙發上，享受休息時光。

Out of syllabus = None of my business

Mango B: 點解D動物要食D仲有生命既動物既？

Mango Ma: 咁其實人都係架，你食嗰Ｄ豬牛雞本身都有生命架啦！

Mango B: 係喎！咁咩動物會食人呀？

Mango Ma: 食肉既動物就會架啦

Mango B: 即係獅子、老虎嗰Ｄ？

Mango Ma: 係呀！

Mango B: 咁你又話獅子唔會食人既？

Mango Ma: 唔係，我係話佢地無機會食人，因為我地生活既環境都無獅子、老虎。除非你自己走入去個森林入面啦，咁佢可能都會食我地架

Mango Ma 著眼點是讓 Mango B 知道，動物不是特別可怕或奇怪，其實人都是一樣，會吃有生命的動物。唯 Mango Ba 聽罷似乎不大滿意 Mango Ma 的回應，想了一會，便開始他的講解。

Mango Ba: 其實人或者動物食野都係想吸收一Ｄ養份，例如：蛋白質，但係呢Ｄ養份只會喺有生命既動物度先搵到，呢Ｄ養份係動物既主要既 composition，而呢Ｄ物質喺無生命既野度係無既（下刪一百字）

此時，Mango Ma 留意到 Mango B 左望望，右望望，估計她因為不理解 Mango Ba 所講的內容，便嘗試簡化及綜合 Mango Ba 的講解。

Mango Ma: 爸爸既意思即係，我地食野要吸收營養，不過Ｄ營養可以喺動物呀、植物呀嗰度會有，而係其他Ｄ死物度例如泥土係無既，所以你只會見到Ｄ動物去食另一Ｄ動物，而唔會見到Ｄ動物去食泥土。

Mango Ba: 係呀，你第時大個就會學到一個字 "organic"

Mango B: 咁第時先講啦！