人仔細細講呢D

Mango B 對於自己的身體感覺十分敏銳，加上她有很不錯的說話能力，故可以將這些感覺描述得很細緻，聽過她的描述，會不期然回應「係呀，係呀，我都覺得係呀！」

例如：「我如果喺學校行左好多樓梯，或者跑黎跑去，咁我就會無似無哂氣咁，呢度（指著額頭）就會痛架啦！」

又例如吃晚飯時有一碟較難咀嚼的食物：「你覺唔覺得呢，如果你不停咬Ｄ好難咬呀好硬既野，咬左好耐之後呢度（指著後尾枕）就會好似痛痛地咁架啦！」

還有，如果去Ｄ較有情調的餐廳：「如果食左好耐飯，食完飯隻眼就會覺得好刺。」

除左身體感覺之外，她亦會訴說一些心中的想法，聽過後我才知道原來六歲人兒已經會有這些看似成人的想法。

視「做得好」為當然，甚少自我欣賞

Mango Ma：你今日過成點呀？

Mango B：OK 啦！

Mango Ma：即係點呀？講多Ｄ比我聽啦！

Mango B：都無咩既，好似平時上堂咁啦！

Mango Ma：咁今日有咩做得好既地方呀？

Mango B：吓！我唔會諗呢Ｄ咁既野架喎！

Mango Ma：吓！點解唔諗下呀？咁欣賞下自己咪幾好囉，知道自己有咩好就繼續做得好

Mango B：我好少會諗呢Ｄ，通常都係人地講你好，自己諗自己好咁怪

努力同成功的關係

Mango Ma：今日你同班主任講你想英文好Ｄ，其實你想英文點樣好Ｄ呀？

Mango B：即係想講得好Ｄ，gi lee gu loo wa ha ka

Mango Ma：咁你覺得點樣先可以講得好Ｄ？

Mango B：練多Ｄ囉，我日日都練（亂整咀型）

Mango Ma：係喎，練多Ｄ可以幫到你講得好Ｄ。咁叻既你，知道練多Ｄ可以幫到自己？

Mango B：樣樣野都係練多Ｄ就好Ｄ架啦，睇你練咩架啫

人與人之間的溝通

Mango Ma：爸爸而家差不多揸車番黎啦

Mango B（自信滿滿）：我寫比佢張卡Ｄ野佢真係有做架喎

Mango Ma：點解爸爸唔番黎食飯你就送卡比佢，我日日番黎食飯咁乖，你又唔送卡比我？

Mango B：咁都無野要同你講

Mango Ma：咁你可以同我講Ｄ thankful 既說話架？

Mango B：唔駛啦，口講咪得囉！

滿意的餐廳

Mango Ma：其實你鍾意去邊Ｄ餐廳？

Mango B：間餐廳要靜靜地，唔好咁噪

Mango Ma：仲有呢？

Mango B：唔好咁暗，有個大窗既

Mango Ma：仲有呢？

Mango B：Ｄ野食好味既

Mango Ma：仲有呢？

Mango B：無啦！

Mango Ma：咁有無餐廳你覺得係有齊呢幾樣野，係你好鍾意架呢？

Mango B（想了很久）：有，有一次同爸爸嗰邊食 buffet 嗰間（那間是酒店頂樓 270 度落地玻璃，提供半自助餐，晚上不招待小孩的餐廳）😆😆

Mango Ma：嘩，你都好識揀喎！咁上次同你去淺水灣嗰間呢？有個窗睇到大海，古典優雅又要細細聲講野嗰間呢？

Mango B：好呀，嗰間都好鍾意呀！😍😍