克服恐懼的第一次

以下是 Mango Ma & B 晚餐時的對話：

Mango Ma：今日online learning點呀？
Mango B：OK呀！但今日個錄影着咗藍色燈呀，我琴晚已經見到架啦，要叫爸爸整番。
Mango Ma：好呀，今晚佢番黎我叫佢整啦！
Mango B：嗯
Mango Ma：但係點解你琴晚會見到藍燈既？你瞓緊覺架？
Mango B：我起身去廁所呀嘛！
Mango Ma：吓！你起身？你幾時起身呀？
Mango B：唔……12點幾到啦！
Mango Ma：吓！你半夜起身？
Mango B：係呀！急尿呀嘛！
Mango Ma：你有無叫我呀？我聽唔到呀？
Mango B：無叫你呀，你瞓緊覺呀嘛，我見到你瞓覺呀！
Mango Ma：吓！咁你有無叫姐姐陪你呀？
Mango B：無呀！我自己去呀，你話可以自己去架嘛！
Mango Ma：吓！唔係呀嘛！我完全無聽到聲，完全唔知喎！你講真架？
Mango B：係呀，梗係講真啦！你唔信自己睇下個錄影機啦！
Mango Ma：唔係唔信你，不過真係好 surprise 喎！你自己去唔怕咩？
Mango B：我仲無開燈添呀！
Mango Ma：去到廁所都無開燈？
Mango B：係呀！唔駛啦！
Mango Ma：吓！我暈啦！你咁勇敢？
Mango B：我都驚架，咁又急喎，又唔想噪醒你瞓覺
Mango Ma：你咁錫媽咪呀！多謝你！不過你需要既話，係可以叫醒媽咪架，媽咪ok架
Mango B：咁我咪想自己起身，但又有d驚又瞓番低，又起身，又瞓低囉
Mango Ma：你好掙扎呀，傻妹！咁跟住點解最後咁勇敢去到呢？
Mango B：我咪自己「俟」【意思：求】自己囉，係咁俟，係咁俟囉！
Mango Ma：咁你點俟呀？
Mango B：我咪同自己講，試吓啦，去啦，咁囉
Mango Ma：嘩！你好叻呀！咁跟住點呀？
Mango B：咁我咪去囉，去完咪上番床瞓覺囉！
Mango Ma：嘩，你真係好叻呀！媽咪覺得你好勇敢呀！
Mango B：我都覺得自己今次叻呀！
Mango Ma：係呀，你真係好叻呀！你知道有d野你雖然驚，但你會用d方法幫自己，同自己講d打氣既說話，咁就可以做到啦！咁你要記住今次既經驗，下次驚你就知點做啦！
Mango B：嗯
Mango Ma：你真係講真架？
Mango B：哈哈，都話真架落
Mango Ma：咁爸爸今晚番黎，我可唔可講比佢聽呀？
Mango B：可以！
Mango Ma：你真係好叻，好勇敢呀，真係大個女啦！
Mango B：嗯
Mango Ma：咁其實你驚d咩啫？
Mango B：驚有動物囉，驚有怪獸囉
Mango Ma：哈哈，咁你琴晚有無見到呀？
Mango B：無呀！
Mango Ma：咁咪係囉
Mango B：唔係呀，見到一個 Mango B 怪獸呀！
Mango Ma：喂，做咩話我個女呀，我個女唔係怪獸喎，不知幾可愛幾抵錫呀！
Mango B：係咩？

成長從來都是預期會發生的事，尤其是孩子的正常發展更加是人所共知、了無新意。偏偏這些「第一次」的出現仍會令父母感到驚喜、讚嘆，是種很獨特的感受。這次的成長事件發生在這個驚青、過敏的小女孩身上，是 Mango family 上上下下共同努力的成果，實在令我們格外興奮、欣慰。

期待更多令人鼓舞的成長小事陸續有來，Mango Ba & Ma 定會金睛火眼、落足眼力去享受這個小女孩的成長經過。