國際學校的文化差異

入讀國際學校，Mango Ba & Ma 會擔心 Mango B 的適應問題，始終學校比較多外籍人士（老師及學生皆是），Mango B 是校內少數的香港人，

我們想像言語不通、文化差異等都可能是常見的問題，加上Mango B 本身性格比較慢熱、被動，或許會加劇融入的問題。

入讀學校年多，我們發現原來學校有不少持外國護照的香港人入讀，數據上或者只有10％香港人，但事實上肯定超出這個數字。Mango B 曾分享說，孩子們知道誰能說廣東話、誰不能，所以他們會看看玩伴的組合而決定用甚麼語言溝通，隨時「轉台」亦可。

與其說我們擔心Mango B未能適應學校的文化，我們發現不適應的可能是 Mango Ba & Ma，畢竟我們沒有身處其中，只帶著我們兒時對學校生活的回憶陪伴她的成長。隨著每天晚餐時談及學校生活的片段，不難發現各式各樣的文化差異，包括：處事手法、對孩子的期望、對測考的重視程度、對勝負的看法等等，而這些分別讓我們更加安然繼續讓她留在國際學校成長。

班長

Mango B：咩係班長呀？

Mango Ma：班長即係幫老師手既同學，例如幫手收吓簿呀，派吓野呀

Mango B：咩唔係人人都要幫架咩？

Mango Ma：係架，咁就當然好啦！

測驗

Mango B：今日上堂既時候，老師比咗份test我地做呀

Mango Ma：吓，咁突然既，做咩架？你識唔識呀？

Mango B：咪派一份野咁囉，好多頁架，填吓d字呀，寫吓野呀，我做唔哂呀，然後老師就收咗啦

Mango Ma：做唔哂？咁其他人做唔做得哂呀？

Mango B：我唔知呀，要only look at your own paper，唔可以睇人地架

Mango Ma：咁做唔哂點算呀？

Mango B：無點算架，老師想睇吓你識唔識啫

Mango Ma：咁呢，乖女，你識呢就要寫出黎比老師睇，下次試吓寫快d，盡量做哂全份test，咁樣老師先知你識好多野架嘛

Mango B：唔

Mango Ma：咁老師有無講你做成點架？

Mango B：無架

廁所

Mango B：媽咪呀，有一日我真係嚇死呀，去錯咗老師廁所，一出黎就見到 Ms. XYZ

Mango Ma：係？點解去錯咗既？

Mango B：嗰日我去 music 堂，之後急尿咪喺2樓去廁所囉，點知一出黎就見到 Ms. XYZ

Mango Ma：咁點算呀？你去錯咗老師廁所。門口無寫架咩？

Mango B：無架，淨係有男仔同女仔既公仔，咁我見女仔既公仔，我咪入去囉

Mango Ma：咁去錯咗會唔會比老師話架？

Mango B：唔會，Ms. XYZ 咪提我，this is the teacher's toilet, next time you can go to the other one

操場上

Mango B：今日小息既時候，有個小朋友潑d沙，整到我隻眼

Mango Ma：唉呀，咁你點呀？有無事呀？

Mango B：我去話比 duty teacher 聽

Mango Ma：係呀，啱呀，話比老師聽，等老師處理啦。咁佢之後點做呀？

Mango B：佢叫我自己同佢講，唔好咁樣潑d沙

Mango Ma：啊，咁你點呀？

Mango B：我咪同佢講囉

Mango Ma：咁個小朋友點呀？

Mango B：佢無應我，可能佢聽唔到啦

Mango Ma：吓，咁你點呀？

Mango B：咁咪繼續玩其他野囉

Mango Ma：咁無事就玩其他囉

Mango B：可能佢細個，聽唔明啦，我見佢都係著我呢d校服，同埋矮d既

Mango Ma：係啦，你真係大方

勝負

Mango Ma：今日番學點呀？

Mango B：今日老師同我地玩遊戲呀！

Mango Ma：咁開心呀，點玩架？

Mango B：（將成個遊戲簡單複雜化咁講咗一次）

Mango Ma：咁你嗰隊點呀？邊隊贏、邊隊輸呀？

Mango B：我地嗰隊贏咗

Mango Ma：嘩，yeah，咁贏咗會點架？

Mango B：吓，無架，咁咪開心吓囉

點蟲蟲

Mango B：媽咪，我今日有d犀利野想講比你聽呀！

Mango Ma：咩犀利野呀？

Mango B：今日我放條mealworm喺我隻手度呀

Mango Ma：吓！mealworm？蟲喎，你夠膽咩？

Mango B：Ms. ABC 話一定要試喎，驚都唔可以大叫呀、we we wa wa 呀

Mango Ma：嘩，你真係好犀利、好勇敢呀！咁就咁放喺手上面呀？

Mango B：老師會拎佢放喺你隻手上面既，我一開始有d驚，所以戴咗手套，跟住第二次先就咁放喺手上面

Mango Ma：就咁？你喎，你講真架？

Mango B：係呀

Mango Ma：咁佢咪喺你隻手度行囉？

Mango B：係呀，佢會行行吓跌咗落黎架

Mango Ma：嘩，咁你覺得點架？

Mango B：好slimy, squishy, 好wiggly 架

Mango Ma：嘩，你真係好勇敢呀！比著我都未必夠膽呀！

Mango B：我都覺得自己幾勇敢呀

Mango Ma：直頭超級勇敢啦，嘩，你真係好犀利呀，原來我有個咁勇敢既女！